極權強行通過惡法，法治崩壞，議會失效，新聞自由及言論自由被打壓，抗爭者遭受大規模清算，被暴力對待、被囚禁、被恐嚇， 全民活於全面監控及白色恐怖之中......呢一切，喺出現反送中運動時，甚至更早之前，我都想像到，好多人都想像到。而想像到，又或者「預見」到，其實亦冇乜好值得得戚，無須擺出一副先知嘅姿態大大聲講I told you so或者周圍笑人對不公事件嘅反應。
因為想像到最壞情況並唔代表特別叻，甚至再壞啲嘅情況大把人都可以隨口噏：香港將會差過北韓、香港人將遭受隨意搶劫姦殺、所有抗爭者都會被送去集中營活摘器官同凌虐......諸如此類，其實你夠悲觀同有想像力就得，並唔係啲咩過人嘅洞見。講呢種說話嘅人，唔少都只係想有優越感，表現出自己比一般人更有先見之明，反正講中咗就可以認屎認屁，就算唔中，都可以話「而家未發生啫，遲啲你睇下點」。當中有啲失敗主義者，更可以心安理得地藉此否定所有人嘅努力，繼續散播恐慌同無力感，將自己嘅不作為反倒抬得高人一等。
當然我都唔排除有啲人講呢種說話，可能係出於「好意」，想大眾唔好盲目樂觀，唔好再對現時制度抱持不切實際嘅幻想，要另闢蹊徑或者破釜沉舟咁去抗爭。但問題係呢種「遠見」從來都唔係得你一個諗到，如果你有一套更好嘅論述或更有前瞻性嘅計劃，你又有冇盡全力咁去完善、去推廣、去實行？喺呢種時候發爛渣或者幸災樂禍，並唔會顯得你比所謂愚昧嘅群眾高尚，只令人感到面對晚期中二病人嘅尷尬咋。
Search